مراجل
علي الشباني
غني لعيون الزلم للموت للدخان
للدنيه الركص بيها النذل من ذلة الجوعان
ياكلب حزنان ياريحة كصب
غني للكصو الوسيعة البيها
مزرك العصب
زامط اعروك الفحم بالنخلة المحملة ذهب
غني موت الناس
حزن الليل حزن المهر المحجل
واشتم ابشفة طفل جفة خجل
لولح الدمعة ابقحط نيسانه دمعة عسل
كابح الكيظ ابوكاحة عين مملية مراجل
اكفع ابمهرك يزته الحيل وتشيمة الهلاهل
شيط خنجر فصنه يتفاوه
يكص ماي الشمس
ايمشط امن الريح كذلة ايفكس عيون المذلة
هيلة هيلة نشتل ابكاع الجدم للزين هيلة
يخورس الدنيه صهيلة يامهر صبحية وديني لهلي
اسودت الخضره ابربيعي روحي وجت نار فوك الماي
روحي انداف بيها الداي وانته وياي عجة ليل
تطفي الشوف بعيوني
وحشة كل نكلة جدم فوك الرمل عكرب اصفر
وبسمانة الطير يتبسمر يوم البي لفانه شباط يوم اكشر
انكل ابموتي الوني الدنية السراب
ادفن الضحكة العزيزة بالتراب
بلجن اتكفع جماية بلجي وي ريح الورد توصل كطاية
تشتل البيضة النسيم الليل عين الليل كحل الليل يبرن الغمزة النجمة يحضر الفارس
يعته الليل من حلمه يوعة والغيرة البدمة
تترس البيدة مسج حسه يمر فوك الرمل ويطك ورد
خلي كلبي المخمس ياخذله ميلة
ايخضر الحس الجريح ابرية المسكون ليلة
ويكعد الشوك اعله حيله
لا توجد تعليقات
أضف تعليقك
كتاب الحقيقة
