إِذَا مَات النَّهَر

عدد القراءات : 31
حجم الخط: Decrease font Enlarge font
إِذَا مَات النَّهَر

كانت السلطات البعثية تعرف تماماً من هو ستار خضير (أبو مي).. فهو ليس مجرد قائد شيوعي ومسؤول الخط العسكري في الحزب فحسب، إنما كان مشروع ثورة وقائدا ثوريا، لذلك سعت بكل طاقتها لتصفيته والتخلص منه !!

عثر جدم الزمان وطاح والد مَي .. 

       عمت عين الزمان اشعثر من عثره

إنكسر ضلع التحدي بموت والد مَي

            خمس عقود محَّد جبَّر الكسرة

خمس عقود نآكل من لحمنه الحي

            وحدر جلودنا مورثة ألف جمرة

عثر جدم الزمان وضاع أجمل شَي

               لهذا اليوم محَّد ناقش العثرة :

لماذا وليش وشلون الحصل والصار

               أنه بگلبي بلاوي وأسئلة خطرة

سؤال يجِّر سؤال ونار تحرگ نار

                وأمَر من المنايا الأجوبة المُرَّة

إذا طاح الجبل معناها صاير شَي

               لو ثمة خلل .. لو بالجبل ثغرة

وإذا مات النهر، موش العتب ع المي

           العتب كل العتب ع الما حمه نهره

چذب عين الشمس يكسر رمحها الفي

              إذا عين الشمس متنمرَّة وحمره

دحط كل الظلام اگبال برگة ضَي

       وشوف شلون يشّرد من تجي الگمرة

إذا تقصير حاصل لازم انقر بيه

                  والمقصِّر وجوباً لازم انقصّره

ما أشك بالحزب هذا حزب خيون

           أخوي الماتت أمي وما لگت گبره

ما أشك بالحزب هذا حزب هندال

          لَهذا اليوم باسمه اتفاخر البصرة

ما أشك بالحزب هذا حزب وضاح

               ميِّت، والأعادي تخاف تتذكره

ما أشك بالحزب هذا حزب بشار

            واتحدَّه النخل لو يوصل لصدره

ما أشك بالحزب هذا حزب شمران

                  إمام الصراحة وسيَّد الفكرة

ما أشك بالحزب هذا حزب طوفان

            أبو ليلى الصبُر يتنومس بصبره

ما أشك بالحزب هذا حزب جاويد

            حزب تلو وسلام وخالد وذكرى

ما أشك بالگمر هذا گمر فريال

            وأنسام وعميدة وعايدة وبشرى

ما أشك بالشمس هذي شمس إكرام

               وجواد العطية ومتي أبو سمره

ما أشك بالحزب هذا حزب توماس

                أطهر من حليب الزاچية الحرَّة

أشكن؟

أشكن بيَّه آني وما أشكن بيه

             ورد آذار ياهو ايشكك ابعطره ؟

مطر تشرين ما يحتاج أي برهان

            مثل ريحة العنبر ريحة المطرة

هم هيچ الحزب وأكثر بعد تلگاه

         مواسم للفرح وأعياد للخضرة

ما أشك بالحزب هذا حزب الانصار

              من دم النصير اتشع الف زهرة

لا تسأل بشر خاف البشر تنحاز

              روح لهندرين وإسأل الصخرة

مو بس الجبل يحچيلك إعله الصار

       باهوار الغموگة تشوف الف ذكرى

تفگ خالد وأمين لهسَّه محتَّرات

        وابو محيسن علم خفاك بالشطرة

ما أچذب عليك وداعتك مشتاگ

             مثل شوگ البنات لفرحة الزهره

وما أچذب عليك وداعتك عطشان

             يرويني ودادك واشبع بنظره

وما أضُمَّن عليك وداعتك تعبان

            أريد ابفيك أغفه وانته فَي شجرة

يا أمي وأبوي واهلي والخلان

             ياگمرة حياتي وأحلى كل گمرة

مرات الكسر يثگل على المكسور

              والمكسور ما يتحمل الكسرة

ومرات الظنون تلوج وسط الروح

             لچن گلبي عفيف ويسِّتر العشرة

   ثلثين العمر خلصته شوگ وياك

           وما اريد بتوالي اسنينه اندمره 

ما اغير هواك ولا أغير الشوگ

         ألف موته أموت وشوگي ما اغيره

يا طعم الثمالة وأحلى ما بالكاس

            اريد الليلة اشربك واختم السهرة

جنت بأول ربيعي .. وأزغر من الطير

           گلت هذا الكلام ولسَّه أنه اتذكرَّه

لو ستار ما طايح هذاك اليوم

              چا فوگ الشمس راياتنا الحمره

ولو ستار ما طايح هذا اليوم

              چان الليل ناصي وعالية الگمرة

ولو ستار ماطايح هذاك اليوم

                جان أحله المدن بالعالم الثورة

ولو ستار ما طايح هذاك اليوم

               چا روما العمارة ولندن البصرة

ولو ستار ما طايح هذاك اليوم

         چا نخل السماوة اتطرَّه الف سمره

ولو ستار ما طايح هذاك اليوم

          چا هسَّه الرمادي أورود مو صحره

وجان الموصل اجمل من صباح الخير

                   وأجنحة الفرح بديالى منتشرة

ولو ستار ما طايح هذاك اليوم

               ما شفنه حروب ونار مستعرة

ولا شفنه منافي وليل الولايات

         وعلى ابواب اللجوء آلاف منتظرة

ولو ستار ما طايح هذاك اليوم

             چا ماكو فقير ولا بقت فقره

وچا اربيل ترگص چوبي وي ميسان

          وبدهوك العزيزة تصِّيف البصرة

وچا بغداد كعبة وقبلة للأحرار

               وكلمن زارها تنوله الف عُمرة

وچا بابل أنيقة وأحلى من العيد

               وسامرَّه لمجدها تعود سامره  

وچا واسط قصيدة بشفة الأنبار

         وأبو الطيب عليها يبث عبق شعره

وچا وادي السلام اگبوره مو مليون

           بل مليون نخلة وزنبقة وشجرة

وچا هور الچبايش أحلى ما بالكون

            لوحة من الخيال الفاتن بسحره

لكن للأسف طاح الگمر مغدور

              والتاريخ حافظ ملحمة غدره

طفه غفلة النهار وضاع سِّر الليل

               وهاي اسنين محَّد گادر يدوره

إنكسر ضلع التحدي بموت والد مَي

                ولهذا السبب ما صارت الثورة.

لا توجد تعليقات

أضف تعليقك

من فضلك أدخل الكود الذي تراه في الصورة:

Captcha

كتاب الحقيقة

عدنان الفضلي ... تفاصيل أكثر
علي علي ... تفاصيل أكثر
طه رشيد ... تفاصيل أكثر
ريسان الخزعلي ... تفاصيل أكثر
غرام الربيعي ... تفاصيل أكثر
أياد السماوي ... تفاصيل أكثر
علي علي ... تفاصيل أكثر
أياد السماوي ... تفاصيل أكثر
هادي جلو مرعي ... تفاصيل أكثر
عدنان الفضلي ... تفاصيل أكثر
علي علي ... تفاصيل أكثر
جواد أبو رغيف ... تفاصيل أكثر
عدنان الفضلي ... تفاصيل أكثر
ريسان الخزعلي ... تفاصيل أكثر
قاسم حسون الدراجي ... تفاصيل أكثر
علي علي ... تفاصيل أكثر
د. موسى الحسيني ... تفاصيل أكثر
د. سارة كنج ... تفاصيل أكثر
علي علي ... تفاصيل أكثر
انتصار الميالي ... تفاصيل أكثر