الرسالة العملية

عدد القراءات : 602
حجم الخط: Decrease font Enlarge font
الرسالة العملية

الشاعر نوفل الصافي

الكره يبطل وضوء  

والتبات ابحضنه غيـبة يغتسل باقرب نهر  

للشوگ دافي ـ على الأحوط ـ مرّت ابجرفه حبيبة  

ولو سمعها - وإن سهوا 

يشطف اذنه نص نهار ابنده تغريد البلابل!! 

اليمس خد الورد كفارته يزرع حديقة 

واليصافح چف جرادة... امنين ماچان 

انتماءه وانتماءات الجرادة فهو باطل.. 

ديّة يدفع للسنابل .. حرگ گونية مناجل!! 

البيوت الخالية من طير للحب ما تصح بيها صلاة 

اليطوف الناس بحرام المحبة 

حجته مقبولة ولا يحتاج للكعبة وصول 

اليصلي وقبلته ارموش الفقير.. 

وما إجه ابّاله اشحچه اشگال الأمير 

اشلون ما رايد يكبـّر خل يكبـّر 

آنه اضمنله ابتسامة من الرسول 

الدعاء ابلا شعر للناس.. للحب 

للأمل.. ما مستجاب. 

ولو إجه فرض القصيدة ما تصح 

تـُكتب قضه. 

لوحة المليانه حب .. تبقه 

..وتموت لوحة المرسومة لون امچفنه 

اعله الحايط بتابوت خشباته شعار 

واليعض شفته ابوجه باب الشتيمة 

انتصار. 

ريحة البارود محظورة بتاتا 

واليلامس سيف يكفلّه يتيم 

الشبابيچ التجيلك منها ريح 

إرسم اعله اخدودها بوسة اشراع 

وابحر اشما مدلك الله ابروجه بجناح الضوه 

لاصلاة للخوف بمتون الرسالة 

ركعة الرجفة حرام 

ليش خايف؟ 

القصور العالية خدرانة حيل 

والحچي بس للصرايف 

واللسان مو فقط للضوگ.. 

والله موفقط للبوس خالقها الشفايف.. 

ليش خايف؟ 

اللسان الينگص ايخضر اهلال 

يركض اعله الباچر ابحلم الامس 

ويجي باچر 

ويجي شاعر 

يكتب الجملة الكتبناها أمس!!! 

الچان باچر يوم چنه اول أمس 

وهاي هيه .. 

الغيمة غيمة اشما يدثرها الظلام 

اتطيح من تضحك شمس 

النجمه من تموت لاتلبس عليها الدمع الاسود 

الگمره تحبل كل شهر تنطيك نجمه 

إرسم الطيف اليعجبك 

وافتح اعيونك تشوفه.. 

وابصم ابخد السمه اللون التريده 

وللأمانة .. 

الگاع حرة.. فشلة تتخطط سجن!! 

وللأمانة.. 

الدين حل المشكلة.. 

وعيب يصبح 

مشكلة وتبچي اعله حل 

الله خير اچفوفه مليانة فراشات وسلام 

المحبة اقرب طريق الباب حنية الإله 

الزكاة واجب على كل المشاعر 

ابلايه حب .. تكفض اجفون البراءة 

تنطفي الدنيه ويخوط الليل چايه بالصبح 

تنچفي الذلـّة عله خدود الملح .. جربة دمع 

ابلايه شوگ .. 

تنشف اللهفة ويفرخ ابليس بعيون الشمع 

النخله أم 

شجرة التفاح أم 

ونومة العاشگ عبادة شرط 

ماناسيله موعد 

الگلوب الليلو اكلادة عرش 

ما يطب الجنة من يرعب فراشه 

آثم اليصنع مخدة نوم من ريش الحمام 

الشهور الحرم عشرة الباقي عيد.. 

أحمر الشفة غروب يفتح الليل 

اعله موسيقى الجمال 

والتيمم جائز ابكحلة عراقية اصيلة 

العراقية الأصيلة 

الشدّت ايزار الحصار 

وطبخت ابجدر الصبر لمن سجد.. 

يمها كلشي ابّالك ايصبّح حلال 

العراقي ..الينحني ابنيّة وقوف ايعبـّر الجيل الوراه !! 

الخط الأحمر يبدي من باب الطفولة 

امن ابتسامة طفل مثلومة 

عله اضفاف الشفايف 

تاكل ابلبّة لهاته 

شوغة اخرس ترفس ابگلبه قصيدة 

حوبة البلبل چبيرة 

اتعثر الشط ّ و ثلث ترباع 

من بحر التلوحه 

الخط الاخضر يبدي من باب الطفولة .. 

ابطور "داخل" 

والدللوش الحنينة ابصوت فيروز 

اليذكرني ابوطن منهوبة ترچية فراته 

طور داخل حرز عن غول المكابر 

والـ (بنفسج) تنقره حين الولادة 

اتگطـّر ابإذن الرضيع 

ويّه كل فرة اگماط اتلولي فيروز 

ابدللوش امهاته 

الخط الاحمر يبدي من باب الطفولة 

وينتهي ابخيط البريسم 

خيط البريسم مقدس .. 

شيلة الأم علم والـ (چِــلاّب) راية 

والشبگ تنور أم حته ـ لو باقي أثر ـ 

يعتبر طالب لجوء .

لا توجد تعليقات

أضف تعليقك

من فضلك أدخل الكود الذي تراه في الصورة:

Captcha

كتاب الحقيقة

علي علي ... تفاصيل أكثر
عدنان الفضلي ... تفاصيل أكثر
محمود السعد ... تفاصيل أكثر
علي علي ... تفاصيل أكثر
كريم النوري ... تفاصيل أكثر
قاسم حسون الدراجي ... تفاصيل أكثر
علي علي ... تفاصيل أكثر
ناظم محمد العبيدي ... تفاصيل أكثر
ساطع راجي ... تفاصيل أكثر
علي علي ... تفاصيل أكثر
د. حسين القاصد ... تفاصيل أكثر
عبدالامير المجر ... تفاصيل أكثر
علي علي ... تفاصيل أكثر
حسين علي الحمداني ... تفاصيل أكثر
علي حسن الفواز ... تفاصيل أكثر
علي علي ... تفاصيل أكثر
عدنان الفضلي أنا على يقين بأن انتهاء مرحلة داعش لا تعني ان الساسة سيلتفتون الى تصحيح الأخطاء ومحاولة إنقاذ ما يمكن إنقاذه، على العكس من ذلك ... تفاصيل أكثر
علي علي ... تفاصيل أكثر
عباس الصباغ ... تفاصيل أكثر
نــــوزاد حـــســــن ... تفاصيل أكثر